Өмгөөллийн “ХаанЛекс Партнерс” ХХН (“ХаанЛекс ”) нь банк санхүү, үнэт цаас, дэд бүтэц, эрчим хүч, шүүхийн маргаан, бизнесийн болон компанийн эрх зүйн салбарт голчлон хууль зүйн мэргэжлийн зөвлөх үйлчилгээ үзүүлдэг Монголын тэргүүлэх хуулийн фирмүүдийн нэг юм.

Өнгөрсөн арван жилийн хугацаанд бид өөрсдийн үйлчилгээ, мэдлэг туршлагаа олон улсын зах зээлийн томоохон оролцогч нарт хүргэж ирсэн ба эдгээрт олон улсын хөгжлийн банк, санхүүгийн байгууллагууд, гадаадын төрийн өмчит болон хувийн салбарын тэргүүлэгч компаниуд багтдаг. Бид Монгол Улсад хийгдсэн олон улсын шинжтэй томоохон гэрээ, хэлцлүүдэд эрх зүйн зөвлөгөө өгч, амжилттай ажилласан ба тэдгээрийн зарим нь олон улсын хэмжээнд танигдаж, хүлээн зөвшөөрөгдсөнд баяртай байдаг. Түүнчлэн, хууль зүйн зөвлөгөө өгч ажилладаг бидний үндсэн эрх зүйн салбарууд (банк санхүү, дэд бүтэц, бизнесийн эрх зүй, шүүхийн маргаан зэрэг)-аас гадна хурдтай хөгжиж буй “ногоон санхүүжилт”-ийн эрх зүйн чиглэлээр ажилласан байдал, туршлагаараа Монгол Улсын хуулийн фирмүүдийн дунд бид тэргүүлэх байр суурь эзэлдэг. Өдгөө “ногоон санхүүжилт” нь байгаль орчны өнөөгийн байдлыг сайжруулахад чиглэгдсэн нэн чухал, цогц санхүүжилт болоод байгаа билээ. ХаанЛекс нь эрчим хүчний хэмнэлттэй орон сууц барих, угсармал орон сууцыг дулаалах, сэргээгдэх эрчим хүчний эх үүсвэр барих, хог хаягдал булшлан устгах цэг байгуулах зэрэг ажлыг санхүүжүүлэх, ногоон санхүүжилт олгох санхүүгийн тусгайлсан байгууллага үүсгэн байгуулах гээд “ногоон санхүүжилт”-ийн өргөн хүрээний төслүүдэд амжилттай оролцож, ажилласнаараа бахархдаг.

ХаанЛексийн хуульчид үнэт цаасны зах зээлийн хүрээнд дотоодын болон олон улсын банк, санхүүгийн байгууллагууд, үнэт цаас гаргагч компаниуд, мөн үнэт цаасны зах зээл дэх зохицуулагч байгууллагуудад Монгол Улсын хууль, эрх зүйн асуудлаар зөвлөх үйлчилгээ үзүүлсээр ирснийг дурдах нь зүйтэй. Бид үндэсний хууль тогтоомж, эрх зүйн мэдлэг, туршлагаа олон улсын эрх зүйн тэргүүний туршлага, стандарттай уялдуулан хууль зүйн зөвлөх үйлчилгээ үзүүлдэг ба үйлчлүүлэгчийнхээ бизнесийн хэрэгцээ, шаардлагыг ойлгож, түүнд нь нийцэх бодит шийдлийг санал болгож чаддагаараа онцлог юм.

ХаанЛекс нь үнэт цаасны зах зээлийн оролцогчид хууль зүйн үйлчилгээ үзүүлэх эрх бүхий, Санхүүгийн зохицуулах хороонд бүртгэлтэй хуулийн фирм билээ.